பேராவூரணி சட்டமன்ற தொகுதியில் கடந்த சில ஆண்டுகளாக நடைபெறும் வளர்ச்சி பணிகள் மற்றும் நிதி ஒதுக்கீடுகள் குறித்து பொதுமக்களிடையே பெரும் அதிருப்தி ஏற்பட்டுள்ளது. தொகுதிக்குள் உள்ள அனைத்து சமூகங்களுக்கும் சமநிலை வாய்ந்த சேவைகள் வழங்கப்பட வேண்டியிருக்க, தற்போதைய சட்டமன்ற உறுப்பினர் அசோக்குமார் தனது சமுதாயத்தினருக்கே முன்னுரிமை வழங்குகிறாரா? என்ற கேள்வி தொடர்ந்து எழுந்து வருகின்றது.
அடிப்படை வசதிகளே கிடையாது என மக்கள் குறை. தொகுதிக்குட்பட்ட பல கிராமங்கள் அடிப்படை போக்குவரத்து, குடிநீர், சாலை, தெருவிளக்கு, மயானம் போன்ற முக்கிய வசதிகளுக்கு இன்னும் பூரணமாகக் காத்திருக்கின்றன. சாலை வசதி இல்லாத காரணத்தால், சில கிராமங்களில் மாணவர்கள் பள்ளிக்கூடம் செல்லவும், ஆவசரமான மருத்துவ சேவைகளைப் பெறவும் பெரும் சிரமம் ஏற்படுகிறது.
“எங்கள் கிராமத்திற்கு வரும் பேருந்து நாள் இரண்டு முறையே வருகின்றது. சாலையில் இரவு நேரத்தில் செல்லவே முடியவில்லை. தெருவிளக்குகள் மாதக்கணக்காக பழுதாகவே உள்ளன,” என கூற்றொன்றை பகிர்ந்தார் ஒரு பொதுமக்கள் பிரதிநிதி.
தொகுதிக்குள் உள்ள வளர்ச்சி திட்டங்கள், விழா மேடைகள், தார்சாலை வசதிகள், கோயில் பராமரிப்பு பணிகள் போன்றவை அனைத்தும் பெரும்பாலும் தனது சமுதாயத்தை சார்ந்த பகுதிகளில் மட்டுமே நடைபெறுகின்றன. மற்ற சமுதாயங்களைச் சேர்ந்த மக்கள் எழுப்பும் கோரிக்கைகள் பற்றி சட்டமன்ற உறுப்பினர் பார்வையிடுவதில்லை என்றும், “செய்கிறேன்” என வாக்குறுதி அளித்தும், அதற்கான நடவடிக்கைகள் எதுவும் எடுக்கப்படுவதில்லை என்றும் பொதுமக்கள் மற்றும் சமூக ஆர்வலர்கள் குற்றம்சாட்டுகிறார்கள். அதேபோல், சமுதாய அடிப்படையில் ஒப்பந்த பணிகள் வழங்கப்படுவதால், மற்ற சமூகங்களைச் சேர்ந்த தொழிலாளர்கள் மற்றும் நிறுவனங்கள் வாய்ப்பு இழக்கின்றனர். இது, வேலைவாய்ப்பு வாய்ப்புகள் குறைவதற்கும் சமூக இடைவெளி அதிகரிக்கவும் வழிவகுக்கிறது.
பொதுமக்கள் வலியுறுத்துவது போல, பல இடங்களில் மயானம் முறையாக பராமரிக்கப்படவில்லை. மழைக்காலங்களில், உடலை எடுத்து செல்லும் பாதையிலே சேறும், குழியுமாகி, இறந்தவர்களுக்கே மரியாதை செய்ய முடியாத நிலை நிலவுவதாக மக்கள் தெரிவித்துள்ளனர். இது போன்ற அலட்சியம், ஒரு சட்டமன்ற உறுப்பினரின் அடிப்படை பொறுப்புகளை மறுக்கின்ற செயல் என சமூக ஆர்வலர்கள் தெரிவிக்கின்றனர்.
மக்கள் பார்வையில், தொகுதியில் தற்போதைய சட்டமன்ற உறுப்பினர் செயற்பாடுகள் ஒரே சமுதாயத்தை மையமாகக் கொண்டவை என தெளிவாக தெரிகின்றது. “அவருடைய சமுதாய மக்கள் எங்கு வாழ்கிறார்களோ, அங்கேதான் தார்சாலை வருகிறதே தவிர, எங்கள் பக்கம் ஒரு மீட்டர் கூட சாலை புதுப்பிக்கப்படவில்லை,” என கூறுகிறார் பாண்டவயல் பகுதியில் வசிக்கும் ஒரு கிராமப்புற பெண்.
சமுதாய அடிப்படையில் வளர்ச்சி திட்டங்களை திட்டமிடுவது அரசியலுக்கு எதிரானது என சமூக ஆர்வலர்கள் வலியுறுத்துகின்றனர். ஒரு மக்கள் பிரதிநிதி, தொகுதிக்குள் உள்ள அனைத்து சமூக மக்களையும் சமமாகக் கருதி, பணி செய்ய வேண்டியவர் என்பதே ஜனநாயக நெறிமுறை.
இந்த நிலைமைக்கு மாற்றம் வேண்டும் என பொதுமக்கள் விரும்புகின்றனர். “வந்தவங்க கூட யாருக்கும் எந்த உதவியும் கிடைக்காம வராதே போகும் நிலைதான் இது. இனிமேல் நாங்க அமைதியா இருக்கப்போறதில்ல,” எனக் கூறும் ஓர் சமூக இயக்கப்பணியாளர், இது தொகுதி வரலாற்றில் மாற்றம் தேவைப்படுகிற தருணம் எனக் கூறுகிறார்.
