ஒரு மனிதன் எந்த நிலையில் இருந்து எங்கு வந்து நிற்கிறான் என்பதற்கான உயிர்ப்பான எடுத்துக்காட்டாகத் திகழ்பவர் பட்டுக்கோட்டை தாசில்தார் திரு. தர்மேந்திரா அவர்கள். அதிகாரப் பதவி அவருக்கு அடையாளம் அல்ல; தளராத முயற்சி, தொடர் உழைப்பு, சமூக அக்கறை – இவைதான் அவரது உண்மையான முகவரி.
1998-ஆம் ஆண்டு எம்.எஸ்.சி., எம்.பில். பட்டங்களை முடித்த இளம் தர்மேந்திரா அவர்களுக்கு கனவு ஒன்றே ஒன்று – சிவில் சர்வீஸ். அக்காலத்தில் UPSC, TNPSC போன்ற தேர்வுகள் குறித்த விழிப்புணர்வு மிகக் குறைவு. “மிக உயர்ந்த கல்வித் திறன் உள்ளவர்களுக்கே இந்தத் தேர்வுகள் சாத்தியம்” என்ற தவறான நம்பிக்கை சமூகத்தில் ஆழமாக வேரூன்றியிருந்த காலம் அது. அந்தச் சூழலில்தான், நூலகத்தில் தன்னார்வமாக மாணவர்களை வழிநடத்திய தமிழ் ஆசிரியர் ஆர்.தா. பன்னீர்செல்வம் அவர்களின் வழிகாட்டுதல் தர்மேந்திரா அவர்களின் வாழ்க்கையில் முக்கியத் திருப்பமாக அமைந்தது. அந்தக் குருவின் சொற்களே, “இந்தத் தேர்வுகள் எல்லோருக்கும்” என்ற நம்பிக்கையை அவருக்குள் விதைத்தன.
UPSC, TNPSC தேர்வுகளை தொடர்ந்து எழுதினார். ஒருமுறைக்கு இருமுறை. முதன்மைத் தேர்வு (Mains) வரை சென்றார். ஆனால் இறுதிக் கட்ட வெற்றி கைகூடவில்லை. அதே நேரத்தில், வயது வரம்பும் அவரை விலக்கத் தொடங்கியது. அவருடன் படித்த நண்பர்கள் – ஐந்து, ஆறு வயது இளையவர்கள் – இன்னும் வாய்ப்புகளுடன் தேர்வுகளை எழுதிக் கொண்டிருந்தனர். அவர்களே இன்று இளம்பகவத் IAS, முத்தமிழ் – காவல் கண்காணிப்பாளர் போன்ற உயர்ந்த பதவிகளில் இருப்பவர்கள்.
அந்த கடினமான தருணத்தில், டாக்டர் ராம்மோகன் அவர்களின் ஆலோசனை வாழ்க்கைக்கு புதிய திசையைத் தந்தது. மயிலாடுதுறை AVC கல்லூரியில் ஆசிரியராகப் பணியமர்ந்தார். ஆனால் அதுவே அவரது பயணத்தின் முடிவாக இல்லை. “UPSC கைவிட்டது; ஆனால் அரசு சேவை கனவை அல்ல” என்ற மன உறுதியுடன், தேர்வுகளை தொடர்ந்து எழுதினார்.
2008-ஆம் ஆண்டு, அவர் தனது முதல் அரசுப் பணியைப் பெற்றார் – கிராம நிர்வாக அலுவலர் (VAO). பலருக்கு அது நிறைவாகத் தோன்றியிருக்கலாம். ஆனால் தர்மேந்திரா அவர்களுக்கு அது தொடக்கம் மட்டுமே. 2011-ஆம் ஆண்டு மாநில தலைமையகத்தில் நெடுஞ்சாலைத் துறையில் பணியமர்ந்தார். 2012-ஆம் ஆண்டு மீண்டும் தேர்வு எழுதி வருவாய் ஆய்வாளர் (Revenue Inspector) பதவியைப் பெற்றார். அடுத்தடுத்த பதவி உயர்வுகள் – தொடர்ச்சியான உழைப்பின் பலனாக – அவரை இன்று தாசில்தார் என்ற உயர்ந்த நிலைக்கு கொண்டு வந்துள்ளது.
அவரது கல்வி சாதனையும் குறிப்பிடத்தக்கது. தன் சொந்த கிராமமான பட்டுக்கோட்டை வட்டத்தில் உள்ள அலிவளத்தில் முதல் மற்றும் ஒரே பிஎச்.டி. பட்டதாரி, மேலும் மாஸ்டர் பட்டம் பெற்ற இரண்டாவது நபர் என்ற பெருமையும் அவருக்கே. இந்தச் சாதனைகள் தனிப்பட்டவை அல்ல; ஒரு கிராமத்தின் கனவுகளுக்கான கதவுகளைத் திறந்தவை.
வட்டாட்சியராக பொறுப்பேற்று முதலில் கொள்ளுக்காடு பகுதியில் உள்ள மூன்று தலைமுறையாக பட்டா இல்லாமல் வாழ்ந்து கொண்டிருக்கும் ஏழை தொழிலாளி மக்களுக்கு பட்டா வழங்கியதோடு அவர்களுக்கு ஒரு நிரந்தர இருப்பிடத்தை ஏற்படுத்தி கொடுப்பதற்காக எடுத்த முயற்சிகள் கலைஞர் கனவு இல்லம் திட்டம் பெரிய அளவில் கை கொடுத்ததன் மூலம் அவர்களுக்கு இன்று ஒரு நிரந்தர குடியிருப்பை ஏற்படுத்திக் கொடுத்திருக்கிறார். மேலும் இதுபோன்று நடுவிகுறிச்சி பகுதிகள் பல ஆண்டு காலமாக மயானம் இல்லாத சூழலில் அங்கு மயான கட்டிடம் உருவாக வழிவகை செய்ததோடு, துர்கா நகர் பகுதிகளில் வீடு இல்லாத பழங்குடியின மக்களுக்கு பட்டா ஏற்பாடு செய்து கொடுத்தது, நம்பிவயல் மற்றும் ஒட்டங்காடு பகுதிகளில் சாலையோரம் வசித்து வந்த பழங்குடியின மக்களுக்கு குடியிருப்பு ஏற்படுத்தி கொடுத்தது, தாய் தந்தையரை இழந்து ஆதரவற்று உறவினர்களின் உதவியை மட்டுமே நம்பி பாதுகாப்பற்ற சூழலில் வாழ்ந்து கொண்டிருந்த ஒரு பெண்ணிற்கு மாவட்ட ஆட்சியரின் உதவியுடன் அவரின் தந்தையின் இடத்தை மீட்டு கொடுத்து அதில் அவருக்கென நிரந்தர வீட்டு வசதியை ஏற்பாடு செய்தது போன்ற தொடர் குறிப்பிடத்தக்க சிறப்பான பணிகளை மேற்கொண்டு இருப்பதோடு, போக்குவரத்து வசதி குறைவாக இருக்கும் கிராமப்புற ஏழை மாணவர்களுக்கு அரசு தேர்வுகளின் போது சிறப்பு பேருந்து ஏற்பாடு செய்வது போன்ற பல பாராட்டத்தக்க பணிகளை செய்து வருகிறார்.
சமீபத்தில் இந்திய தேர்தல் ஆணையத்தின் வாக்காளர் சிறப்பு தீவிர திருத்த பணிகளை சிறப்பாகவும் விரைவாகவும் செய்து முடித்ததற்காக இந்திய அளவில் தஞ்சை மாவட்ட ஆட்சியர் அவர்களுக்கு குடியரசுத் தலைவர் திரௌபதி முர்மு அவர்கள் பாராட்டி விருது வழங்கினார். இந்த பணிகளில் வட்டாட்சிய திரு தர்மேந்திரா அவர்களுக்கு முக்கிய பங்கு உண்டு என்பதால் தமிழகத்தில் இருந்து தஞ்சை மாவட்டம் சார்பாக மாவட்ட ஆட்சியர் உட்பட டெல்லி சென்ற மூன்று நபர்களில் வட்டாட்சியர் திரு தர்மேந்திரா அவர்களும் ஒருவர் என்பது குறிப்பிடத்தக்கது.
தர்மேந்திராவின் வாழ்க்கையில் ஒரு சிறுவயது நினைவு உள்ளது. அவரது தந்தை – தமிழ்நாடு நுகர்பொருள் வழங்கல் கழகத்தில் தற்காலிக உதவியாளராகப் பணியாற்றியவர். ஒருநாள் தர்மேந்திரா அவர்களை அழைத்துக்கொண்டு தாசில்தார் அலுவலகத்துக்குச் சென்றார். அலுவலக வாயிலில் 45 நிமிடங்கள் காத்திருந்த பிறகே உள்ளே அனுமதி கிடைத்தது. அந்தத் தாசில்தார் குடியிருப்பில் இருந்த கூட்டமும் அவர்களின் பரபரப்பான செயல்களும், அதிகாரத்தின் கம்பீரமும், சிறுவயது மனதில் “ஒரு தாசில்தார் என்பவர் ராஜாவைப் போன்றவர்” என்ற பதியலை ஏற்படுத்தியது. ஆண்டுகள் கழித்து, அதே அலுவலகம், அதே நாற்காலி – இன்று தர்மேந்திரா அவர்களுக்காக.
2025 ஆகஸ்ட் மாதம், பட்டுக்கோட்டை தாசில்தாராகப் பொறுப்பேற்ற தருணத்திலிருந்து, அவர் ஒரு “நிறுத்தமற்ற இயந்திரம்” போல செயல்படுகிறார். பொதுமக்கள் அணுக எளிதான நிர்வாகம், விரைவான தீர்வுகள், மனிதநேய அணுகுமுறை – இவையால் அவர் மக்களின் நம்பிக்கையைப் பெற்றுள்ளார். அதிகாரம் அவரை உயர்த்தவில்லை; அவர் அதிகாரத்தை உயர்த்துகிறார்.
தர்மேந்திரா அவர்களின் பாதை சொல்லும் பாடம் தெளிவானது: தோல்வி முடிவு அல்ல; அது திசைமாற்றம். கனவுகள் மாறலாம், ஆனால் முயற்சி மாறக்கூடாது. இன்று அவர் ஒரு தாசில்தார். ஆயிரக்கணக்கான இளைஞர்களுக்கும், மாணவர்களுக்கும் ஊக்கமாகத் திகழும் ஒரு எடுத்துக்காட்டு. இவரது பணி மென்மேலும் சிறக்கவும், மேலும் பல உயரங்கள் எட்டவும் நீதியின் நுண்ணறிவு சார்பாக வாழ்த்துகள்.
