நாடாளுமன்றத் தேர்தலுக்கான தேமுதிக வேட்பாளர்கள் பட்டியல் வெளியாகி இருக்கிறது. இதில் விருதுநகர் தொகுதியில் விஜய பிரபாகரன் களமிறக்கப்பட்டுள்ளார். விஜயகாந்த் பிறந்த ஊரான விருதுநகரில் விஜய பிரபாகரன் களம் காண்பதால் அவருக்கு அங்கு வெற்றி வாய்ப்பு பிரகாசமாக இருப்பதாக கூறப்படுகிறது.
அதிமுக, பாஜக ஆகிய கட்சிகளுடன் பேச்சுவார்த்தை நடத்தி வந்த தேமுதிக, கடைசியில் அதிமுகவுடன் கூட்டணி அமைத்தது. அதன்படி, அதிமுக கூட்டணியில் தேமுதிகவுக்கு 5 தொகுதிகள் ஒதுக்கப்பட்டன. திருவள்ளூர் (தனி), மத்திய சென்னை, விருதுநகர், கடலூர், தஞ்சாவூர் ஆகிய 5 சீட்கள் தேமுதிகவுக்கு ஒதுக்கப்பட்டன.
இதனைத் தொடர்ந்து, வேட்பாளர் தேர்வுக்கான நேர்காணலை தேமுதிக பொதுச்செயலாளர் பிரேமலதா விஜயகாந்த் நேற்று நடத்தினார். இந்நிலையில், தேமுதிக வேட்பாளர் பட்டியலை இன்று வெளியிட்டுள்ளார் பிரேமலதா. இதில் விருதுநகர் தொகுதியில் விஜய பிரபாகரன் போட்டியிடுவார் என அறிவிக்கப்பட்டுள்ளது. விருதுநகரில் விஜய பிரபாகரன், மத்திய சென்னை தொகுதியில் பார்த்தசாரதி, திருவள்ளூரில் நல்லதம்பி, தஞ்சாவூரில் சிவநேசன், கடலூரில் சிவக்கொழுந்து ஆகியோர் போட்டியிடுவதாக தெரிவிக்கப்பட்டுள்ளது.
இதனிடையே, விருதுநகரில் விஜய பிரபாகரன் போட்டியிடுவதால் அந்த தொகுதி தேமுதிக வசம் செல்ல வாய்ப்பிருப்பதாக அரசியல் ஆர்வலர்கள் தெரிவிக்கின்றனர். விஜயகாந்த் பிறந்த ஊர் விருதுநகர் என்பதால் அங்கு விஜயகாந்துக்கு எப்போதுமே பேராதரவு இருக்கும் எனக் கூறப்படுகிறது. அதுவும் தற்போது விஜயகாந்த் மறைந்துவிட்டதால் உருவான அனுதாப அலையாலும், விஜயகாந்தின் மகன் என்பதாலும் விஜய பிரபாகரன் எளிதில் வெற்றி பெறுவார் எனக் கூறப்படுகிறது.
இந்நிலையில், இந்த தொகுதியில் பாஜக கூட்டணி சார்பாக ராதிகா சரத்குமார் போட்டியிடுவதால் விருதுநகர் தொகுதி நட்சத்திர தொகுதி அந்தஸ்தை பெற்றுள்ளது. நாயுடு சமூகத்தினர் அதிகம் உள்ள தொகுதி என்பதால் அதே சமூகத்தைச் சேர்ந்த ராதிகா அங்கு களம் இறக்கப்பட்டுள்ளார் எனக் கூறப்படுகிறது. அதே சமயத்தில், விஜய பிரபாகரனும் அதே சமுதாயத்தை சேர்ந்தவர் என்பதால் இருவருக்கும் இடையே கடுமையான போட்டி இருக்கும் என எதிர்பார்க்கப்படுகிறது. விஜயகாந்த் விருதுநகரில் பிறந்ததற்கு பிறகுதான், அவரது குடும்பம் மதுரையில் குடியேறிச் சென்றது குறிப்பிடத்தக்கது.
